Dagoeneko 35 urte igaro dira Urtz taldeak lehen akordeak eman zituenetik Pasaia eta Donostia arteko mugan kokatutako entsegu-lokal batean. Nolanahi ere, denboraren zimurrek ez dute taldearen espiritua erasan. Udazken honetan, musikara itzuli da Urtz bere bederatzigarren diskoarekin. Sestaoko Polo Sur estudioetan grabatua izan da eta Esnatzean du izenburu. Lozorroan murgildutako testuinguru sozial honetan, esnatzea eta bihotza iparrorratz gisa hartzea aldarrikatzen du Urtzen disko berriak. Alegia, gure barrualdearekin bat egitea patuak dakartzan erronkei aurre egin ahal izateko. Are gehiago, sentimenduak ezinbestean konformismoaren dunetan hondartzen diren garaiotan. Izaera introspektibo hori, hain justu, Josu Torrealdayk diseinatutako azalean ez ezik, diskoa osatzen duten abesti gehienetan ere islatzen da. Musikari erreparaturik, Urtzen estiloak oso identifikagarria izaten darrai. Edozelan ere, aldaketa esanguratsurik nabari da. Ez alferrik, gitarren marruma eta melodien lasaitasuna soinu elektronikoekin nahasi egiten dira. Ez da, inondik inora, musika iraultza bat, pixkanaka-pixkanaka garatzen ari den mutazio berritzailea baizik. Lasterrera, disko berria aurkezteko xedez, euskal hiri eta herri nagusietako eszenatokietara eramango duen musika bira abian jarriko du Urtz taldeak. Tournée horrek berak Euskal Herriko mugetatik harago ere zabalduko du bere musika.