“Seit ech denke kann, denken ech just mat mengem Häerz” Dës Zeilen aus sengem éischte Lidd “In Love With The Koko”, beschreiwen déi 21-järeg Rapperin Koko47 wuel am Beschten: hatt ass éierlech, et weess wat et wëll an huet grouss Pläng fir d’Zukunft. D’Newcomerin wëll weisen dass een et als Fra och an der Rapzeen zu Lëtzebuerg ka packen an hatt sent domat e klore Message u jonk Meedercher: “Ech hat leider ni d’Méiglechkeet lëtzebuergesch Rapperinnen ze lauschteren an ech wëll dozou bäidroen dass sech dat endlech ännert. ” Momentan studéiert d’Koko47 Media & Music Management zu Berlin, wou et och an engem bekannte Musekslabel schafft. Berlin bitt dem Koko d’Méiglechkeet sech souwuel perséinlech wéi musikalesch weider ze entwéckelen. Hatt zitt seng Inspiratioun direkt aus dem Berliner Lifestyle a genau dat mécht dem Koko seng Musek sou eenzegaarteg. Hei huet hatt sech dann och viru puer Méint fir d’éischte Kéier virun de Mikro getraut an zesumme mam Berliner Produzent TSODOR seng éischt Single opgeholl. Dofir kléngt de Sound och net no Lëtzebuerg, mee no freshem, moderne Sound aus der Groussstad. Inspiratioun fënnt hatt haaptsächlech an däitsche Rapperinnen, wéi dem Haiyti oder och dem Juju, mee awer och an der lëtzebuergescher Rapzeen kennt hatt sech gutt aus, schliisslech ass de Rapper Tommek dem Koko47 säi Cousin. “Mäin Ziel ass et déi lëtzebuergesch Musekszeen no vir ze bréngen an een Hit nom aneren ze droppen”