Eyyub Yaqubov 26 aprel 1965-ci ildə Bakının Bayıl qəsəbəsində anadan olmuşdur. Uşaqlıqdan musiqiyə həvəsi olmuş və musiqi təhsili almışdır. Əlibaba Məmmədovun ansamblında işləyərək fəaliyyətinə pianoçu kimi davam etməyə qərar verir. Lakin bir müddət sonra ifa etdiyi mahnılar məşhurlaşır və 90-cı illərdən etibarən populyarlıq qazanır. “Azəri Torpağı”, “Bakılı Balasıyam”, “Ağabala Çaykovski” kimi şanson ifaları kasetlərdə yayılmağa başlayır və televiziya verilişlərinə, konsertlərə dəvət alır. 2000-ci illərdə Nadir Əzimov, Aygün Səmədzadə, Rəvan Habiloğlu ilə tanış olur və “Mənə Dəniz Verin”, “Ana”, “Unutdun”, “Kim Bilir” kimi hit mahnılara imza atır. Sənətçinin 10-a yaxın musiqi albomu, 20-dən çox musiqi videosu mövcuddur. 2010-cu illərin ikinci yarısından etibarən hər il müntəzəm olaraq Bakının böyük konsert saraylarında canlı konsertləri ilə tamaşaçıların görüşünə gəlir. 2018-ci ildə hazırladığı “Əzizim” adlı mahnısı hitə çevrilmiş və ən çox dinləyicisi olan mahnılarından biridir. Həmin il “Azərbaycan Respublikasının xalq artisti” fəxri adına layiq görülmüşdür.