La Tarrancha ye ún de los nomes con más sonadía de la escena de rock n’asturianu. Entamaron el so camín en 2003 faciendo un personal estilu: el mezigayu ska, o lo que ye lo mesmo, un amiestu de sones tan estremaos como’l ska, reggae, funk, balkan, punk o fol. El resultáu son unos cantares baillables y festivos no musical; acompañaos d’un mensaxe reflexivu, críticu y divertíu a la par. Tienen 5 discos d’estudiu, en 2014 axuntaron a una montonera grupos de tola Península pa que cantaren en delles llingües los temes del so álbum ‘Mezigayuska’, y tienen percorrío una montonera d'escenarios nos que la xente disfruta col so directo potente, divertíu y mui baillable. Esti 2022 regresen con xira nueva y la publicación d'una serie de singles nes plataformes dixitales.