Ayaz Babayev 14 aprel 1994-cü ildə Bakı şəhərində anadan olmuşdur. Fəaliyyətinə 2010-cu ildə onlayn radioda DJ kimi başlayıb. 2012-ci ildə Space TV-də yayımlanan "Sehrli pərdə" musiqi yarışmasına baş vurur və Faiq Ağayevin komandasına daxil olur. 2015-ci ildə əksər hitlərin müəllifi olan Muxtar Abseynovla tanış olur və ilk ifası olan “Çıx Get” mahnısı işıq üzü görür. 2015-ci ildən fotosessiyaları, qısa videoları, ifaları, həyat tərzi və fikirləri ilə sosial şəbəkədəki insanların marağına səbəb olan Ayaz Babayev instaqramda tanınmağa və izləyici sayı artmağa başlayır. Məşhurluğu bu ildən başlayan Ayaz Babayev 2016-cı ildə "The New Voice 2016" müsabiqəsinə qatılır və qalib olur. Sənətçinin ikinci ifası olan “Camalımsan” mahnısını sevənlərinə kliplə təqdim edilir. Ardınca təqdim etdiyi “Möcüzə”, “Ay Tənli Qadın”, “Sən Mənlə” mahnıları yüksək baxış qrafiki əldə edir. Ayaz Babayev 2021-ci ildə Türkiyədə təşkil olunan nüfuzlu “Altın Kelebek” gecəsində mükafat almış və çıxış etmişdir. 2023-cü ilin may ayında kliplə birlikdə təqdim etdiyi “Boş Adamlar” mahnısı ilə günlərlə trend siyahısında lider olur və 10 milyondan çox baxış əldə edir. Sənətçi eyn ildə Bakının böyük konsert zallarından sayılan “Elektra Events Hall”da solo konsert ilə çıxış etmişdir.