Azərbaycan Respublikasının Xalq artisti, Faiq Ağayev 29 dekabr 1971-ci ildə Bakıda anadan olmuşdur. 1988-ci ildən professional olaraq musiqi fəaliyyəti ilə məşğuldur. Onlarla super hitlərin müəllifi olan Faiq Ağayev "Cənab Qızıl Şlyager" adı ilə də tanınır. 1995-ci ildə müğənninin "Ola bilməz" adlı ilk albomu çıxır. Bu albomdan sonra 1996-cı ildə çıxan "Səni əvəz eləmir", 1998-ci ildə çıxan "Vəfasızım", 2000-ci ildə buraxılan "Faiq Ağayev – Seçmələr", 2000-ci ildə çıxan "Minilliyin sonu…", 2004-cü ildə işıq üzü görən "Tam məxfi" və 2006-cı ildə dərc olunan "Faiq Ağayev — Albom Kolleksiyası" albomları müğənninin diskoqrafiyasını davam etdirir. Sənətçi verdiyi solo konsertlərlə rekord göstəricilərə çatmışdır. 20-dən çox böyük solo konsertə, 30-dan çox klipə imza atmışdır.